Првиот човек на италијанскиот фудбал Гравина се плаши од Македонија
Се ближи 24 март кога македонската А репрезентација ќе го одигра полуфиналето од баражот за пласман на Светското првенство против Италија во Палермо.
Потсетување дека доколку триумфираме на овој меч пет дена подоцна ќе играме повторно на гостински терен против Португалија или Турција.
Фудбалската федерација на Македонија (ФФМ) пред три дена ја информираше јавноста дека за следење на натпреварот во Палермо сите заинтересирани поддржувачи можат да се пријавуваат за купување на билети.
Претседателот на италијанската фудбалска федерација, Габриеле Гравина ги сподели своите очекувања во пресрет на дуелот со Македонија.
– За мене првиот натпревар ќе биде најтежок. Да размислуваме на Македонија, треба максимално да бидеме концентрирани. Тоа е добра репрезентација која има постигнато важни резултати – вели Гравина.
Првиот човек на италијанскиот фудбал е оптимист дека ќе биде дозволено од тамошната Влада за 100% капацитет на стадионот „Ренцо Барбера“ за следење на натпреварот за кој околу 20,000 билети се веќе распродадени.