Пробајте го рецептот на Стефанија Несторовска – палента тиквички мафини
Клучот за популарноста на палентата лежи во нејзината разновидност. Може да се послужи со речиси сѐ и затоа е едно од омилените јадења во Македонија, но и во остатокот од светот.
Благодарение на вештите раце и инвентивноста на Стефанија Несторовска која стои зад инстаграм-профилот и блогот snestorovska.com, секогаш имаме можност да пробаме нешто интересно и несекојдневно. Денеска ни донесува рецепт за необичен спој во еден деликатес – палента тиквички мафини. Изобилство од вкусови и ароми.
Состојки:
– 2 мали тиквички, рендани
– 4 јајца
– 1/4 филџан (50 мл) маслиново масло
– 3/4 филџан (10 лажици) палента
– 4 лажици овесно брашно или какво било брашно
– сол, бибер, оригано, минт или зачини по желба
– 1 лажичка прашок за печиво
– додатоци по желба (фета, рендан кашкавал, маслинки, пршута и слично…)
– семиња по желба (сусам, црно семе, сончоглед, семки од тиква…)
Подготовка:
1. Се загрева рерната на 180 степени и се подготвуваат калапи за мафини. Ако користите силиконски мафини нема потреба да ги премачкувате, ако користите било каква друга тава – премачкајте со масло или поставете каписли.
2. Во длабок сад се додаваат ренданите тиквички (нема потреба да се цедат претходно) јајцата и маслото и се промешува.
3. Се додаваат сите останати состојки и повторно се промешува. Доколку користите некој додаток додадете го во веќе измешана смеса па потоа замешајте уште малку да се соедини со смесата.
4. Се печат 20 минути. Оставете малку да се оладат па извадете од калап.
5. Може да се консумираат веднаш или пак чувајте во затворен стаклен сад до 2 дена на собна температура или 4 дена во ладилник.