Украина не треба да биде притисната да отстапи територија на Русија како дел од иден мировен договор, изјави Каја Калас, висока претставничка на Европската Унија (ЕУ) за надворешна и безбедносна политика.

Доколку ѝ дозволиме на Русија да задржи делови од украинската територија, „ќе паднеме во стапицата на (рускиот претседател) Владимир Путин“, рече таа во интервју за Би-би-си.

Тоа беше прво интервју на висок европски дипломат по средбата на лидерите на некои европски земји и шефицата на Европската комисија, Урсула фон дер Лајен, со американскиот претседател Доналд Трамп пред неколку дена во Вашингтон.

Трамп потоа најави средба меѓу украинскиот и рускиот лидер, Владимир Зеленски и Путин, без да даде детали, а во пресрет на средбата со рускиот лидер во Алјаска, тој зборуваше и за „размена на територии“.

Досега никој од Кремљ не ги  потврди информациите  за наводната размена на територија.

Во приказните за размена на територија и територијално откажување од Украина, најспомнуван е Донбас, голем регион на истокот од Украина, богат со минерали и земјоделско земјиште.

Донбас се состои од два региона – Донецк и Луганск, а Русија и Украина се расправаат за тоа со години, дури и пред оваа војна.

Околу 1,5 милиони луѓе го напуштиле овој дел од Украина од почетокот на војната.

Во септември 2022 година, неколку месеци по почетокот на војната, Путин еднострано прогласи независност на четири украински региони: Донецк, Луганск, Херсон и Запорожје.

На картата што Трамп им ја претстави на европските лидери во Белата куќа, а на која Зеленски имаше забелешки, пишува дека руската армија окупирала:

Луганск 99 проценти од територијата;

76 проценти од Донецк;

73 проценти од Херсонската и Запорожската област на југ и југоисток;
четири проценти од Харковскиот регион на североисток;

Процентуално во Сумската и Николаевската област.

Зеленски е категоричен во својот став дека Украина нема да се откаже од ниту еден дел од својата територија, иако Трамп ја нагласи потребата од „размена на територии“.

Каја Калас, која беше ставена на „листата на неподобни“ од Кремљ, изјави  дека во оваа фаза од преговорите нема многу „конкретни чекори“ како средство за одвраќање.

 

„Најсилната безбедносна гаранција е силна украинска армија“, рече таа, нагласувајќи ја важноста на воспоставување гаранции кои „не се само на хартија“.

Таа рече дека на земјите членки на „коалицијата на оние што се подготвени“ им останува да утврдат точно што можат да придонесат и дека сè уште не е јасно во каков капацитет ќе дејствуваат овие сили.

Иако лидерите на некои европски земји од таканаречената „коалиција на оние што се подготвени“ предлагаат нивните сили да бидат распоредени во Украина како дел од повоените безбедносни гаранции, Москва нема намера да го прифати ова, што Путин и шефот на руската дипломатија, Сергеј Лавров, досега постојано го нагласуваа.

По состанокот со европските лидери и Зеленски, Трамп рече дека ниту еден американски војник нема да стапне во Украина по војната, ниту дека Украина може да се потпре на НАТО.

„Тоа нема да се случи, ве уверувам во тоа“, изјави Трамп за Фокс њуз.

 

Високата претставничка на Европската Унија смета  дека Путин добил „сè што сакал“ од средбата со Трамп во Алјаска.

„Тој доби топло добредојде и  барал САД да не му воведуваат санкции, што и го постигнал.“

„Путин само се насмевнува и не само што не го запира убивањето, туку го зголемува бројот на мртви“, вели Каја Калас.

„Забораваме дека Русија не направила ниту една отстапка“, тврди таа.

Таа додаде дека ЕУ го подготвила 19-тиот пакет санкции со цел да изврши притисок врз рускиот лидер за понатамошни разговори.

Во меѓувреме, Трамп поставил двонеделен рок за евалуација на мировните разговори меѓу Русија и Украина.

„Би рекол дека во рок од две недели ќе знаеме каде се наоѓаме – на еден или на друг начин“, рече Трамп додавјаќи дека после тоа, можеби ќе мора САД да заземат поинаков пристап“.

Зеленски и некои европски лидери изразуваат сомнежи во врска со подготвеноста на Путин да се сретне со украинскиот претседател.

„Сегашните сигнали од Русија, искрено кажано, се непристојни и неприфатливи. Тие се обидуваат да ја избегнат потребата од состанок. Тие не сакаат да ја завршат оваа војна“, рече Зеленски.