Воена копнена офанзива на израелските одбранбени сили во Појасот Газа би траела со години и би вклучила ужасни борби, изјави за Политико, Дејвид Петреус, пензиониран генерал на американската армија кој служел во Ирак и Авганистан и поранешен шеф на ЦИА.

Говорејќи по бруталните напади на милитантите на Хамас врз Израел, поранешниот директор на Централната разузнавачка агенција предупреди дека континуираната кампања за копнена инвазија на ИД многу брзо може да стане „Могадишу на стероиди“.

Наведувајќи го инцидентот од 1993 година во кој биле соборени три американски хеликоптери Блек Хок во сомалиската престолнина, предизвикувајќи крвави урбани борби во кои загинаа 18 американски војници, Петреус рече дека ИД ќе се соочи со слична ситуација на територијата на непријателот доколку изврши копнена инвазија.

„Ако Хамас е креативен во одбраната како што беше во тој ужасен, варварски напад, тогаш ќе видите бомбаши самоубијци, ќе видите импровизирани експлозивни направи, ќе има заседи, мини и урбаната средина ќе биде предизвик за војската” тој рече.

Петреус рече дека неговото искуство водење на војската за време на бруталните контрабунтовнички кампањи треба да послужи како предупредување за ИД ако продолжи со копнена инвазија.

„Тешко ми е да замислам потешка средина од оваа конкретна, и командував со силите во голем број големи урбани операции“, рече Петреус. „Не можете да победите во контрабунтовничките операции за една или две години. Тие обично траат една деценија или повеќе, како што видовме во Ирак и Авганистан“, додава тој.