Поради позитивни резултати на брзи тестови: Грција врати два автобуса со сезонски работници од Албанија
Околу 50 албански државјани, поголемиот број сезонски работници, со два автобуса биле вратени од Грција поради позитивни резултати на брзи тестови за ковид-19 што им биле направени на граничниот премин, иако на пат тргнале со негативни наоди , објавија грчките медиуми.
На граничниот премин Какавиа, од петокот, се поставени мобилни единици на Националната организација за јавно здравје на Грција и на сите кои влегуваат во земјата им се прават брзи тестови за ковид-19, иако задолжителна е потврда за претходно направен негативен ПЦР тест.
Според медиумите во Грција, станува збор за фалсификувани потврди со негативен резултат.
До 20 ноември, при влез во Грција се правеа молекуларни ПЦР тестови, меѓутоа поради доцнењето на резултатите, не можеше веднаш да се провери дали потврдите со негативен резултат се точни и затоа сега веќе се воведени рапид тестови.