Покетино си оди од Тотенхем, експресно пронајдена замената
Маурицио Покетино е незадоволен, а воедно и разочаран од случувањата во Тотенхем и сериозно размислува да ја напушти клупата на европскиот вицешампион.
Играчите кои сакаа да си заминат во летниот преоден рок, како Кристијан Ериксен, Дени Роуз и уште неколку фудбалери, на крајот останаа во екипата, по што се наруши атмосферата во соблекувалната, но и заедништвото во тимот. Ваквата атмофера резултира со лоши игри на екипата, Тотенхем моментно е осми на табелата во Премиер лигата и по шест кола има само две победи.
Згора на тоа, тие вчера доживеаја елиминација во Лига купот и тоа од четвртолигашот Колчестер, а во првото коло од Лигата на шампионите испуштија победа на гостувањето кај Олимпијакос.
Сиве овие случувања го натераа Покетино да размислува да си замине од Тотенхем по пет години. Тој летово имаше понуди од Јувентус, Реал Мадрид и Манчестер јунајтед кој сериозно размислува да му даде отказ на Оле Гунар Солскјер.
Претседателот на Тотенхем, Даниел Леви, експресно најде замена за Аргентинецот, во прашање е Масимилијано Алегри кој летово го напушти Јувентус. Алегри веќе оди на часови по англиски јазик за да биде подготвен за понудите од англиските гиганти, но се чини дека Тотенхем е во пол позиција.