Поетска средба со уметницата Лучила Трапацо ќе се одржи во КСП „Центар-Јадро“
Во просториите на КСП „Центар-Јадро“ во Скопје на 10 мај, во 20 часот, ќе се одржи претставување на поетското творештво на швајцарско-италијанската поетеса Лучила Трапацо. Станува збор за ретка можност за непосредна и неформална средба со една од најпознатите и најплодни современи швајцарско-италијански авторки.
Вечерта е замислена како непосредна поетска дружба и средба со авторката на која ќе се интерпретираат песни на неколку јазици и ќе се разговара за поезијата, чинот на творењето, светските современи книжевно-културни текови и сл.
На настанот, македонската јавност ќе има можност одблиску да се запознае со поетското творештво на Лучила Трапацо, која е вљубеничка во македонската култура и јазик, но и со неа како уметница, а пред сè како личност.
На овој редок настан ќе учествуваат и поетесата, преведувачка и слемерка Елена Пренџова, која ќе ја претстави Лучила Трапацо и ќе го води разговорот со неа, и актерката, поетеса и театрологинка Христина Цветаноска, која ќе ги интерпретира стиховите на македонски и италијански јазик. На настанот ќе се зборува на македонски, англиски и италијански јазик.
Лучила Трапацо е швајцарско-италијанска поетеса, преведувачка, актерка, уметница и перформерка. Живеела и творела во многу светски културни центри, меѓу кои и Брисел, Вашингтон и Њујорк, но денес живее во Цирих, Швајцарија.
Ги поддржува човековите права и се залага за зачувување на планетата Земја, а нејзината социјална, феминистичка и т.н. женска гледна точка се рефлектира во многу нејзини дела.
Учествувала на многу меѓународни фестивали (меѓу кои и Струшките вечери на поезијата во Македонија), а нејзините песни се преведени на 18 јазици и објавени во меѓународни антологии и литературни списанија, како и наградени со бројни награди.