Најновото издание „Кам бек“ (Come Back) на Јордан Костов квинтет, кое неодамна се појави под етикетата „ПМГ Џез“, ќе може да се слушне на концерт во живо на 26 февруари во МКЦ во Скопје. Јордан Костов е еден од највредните и најинтригантни ликови на современата македонска џез-сцена. Тој е композитор, хармоникаш и инспиративна фигура, со веќе четири изданија за „ПМГ Џез“.

На новото издание, покрај авторот Костов, учествуваат и Андреа Мирческа, Филип Букршлиев, Дамјан Грујо и Драган Теодосиев. „Станува збор за маркантна и сонично флуентна екипа на млади, но беспрекорно талентирани музичари. Нивната соработка е мошне плодна и се протега на неколку изданија и сценски настапи“, истакнуваат од „ПМГ Џез“.

Концертот ќе се одржи според пропишаните правила и норми за однесување во пандемиски услови со задолжително носење маски и одржување соодветно растојание. Бројот на билети е строго ограничен на 70 посетители.

(Текстот е објавен во „Културен печат“ број 69, во печатеното издание на „Слободен печат“ на 20-21 февруари 2021)