Пијанистот Дино Имери и квартетот „Такси Конзилиум“ ќе настапат на фестивалот „Крај Вардарот џез“

Во рамките на последната фестивалска вечер од второто издание на фестивалот „Крај Вардарот Џез“ на 6 октомври, во 20 часот, во кино „Фросина“ во МКЦ, ќе настапат квартетот „Такси Конзилиум“, а веднаш по нив, Дино Имери, еден од најдобрите надоаѓачки композитори и пијанисти на современа класична музика кај нас, кој ќе настапи соло на пијано.

Групата „Такси Конзилиум“ е квартет на еден од македонските водечки џез гитаристи, Филип Букршлиев. Албумот „The Essential Sunday Gloom“ во издание на „ПМГ Џез“ е прогласен за џез албум на месецот на „Бенд Кемп“, каде што извонредно проаѓа.

Во „Такси Конзилиум“, освен него, членуваат уште неколку извонредни млади музичари: Андреа Мирческа на контрабас, Драган Теодосиев на тапани и Благојче Томевски на кларинет. Нивниот звук е цврст и модерен, небаре излезен од некој „катинг еџ“ њујоршки џез-клуб.

Такси Конзилиум

Пијанистот Дино Имери веќе го издаде и го промовираше авторскиот компакт-диск со наслов „Reflections“ за „ПМГ Џез“. Неговиот развој како композитор на современа класична музика е поврзан со оваа дискографска куќа, за која во моментов подготвува ново издание. На последната вечер на второто издание на „Крај Вардарот Џез“ Имери ќе настапи соло на пијано.

Дино Имери / Фотографија: Владо Србиновски

„Крај Вардарот Џез“ е годишен фестивал на дискографската куќа „ПМГ Џез“. Овој фестивал е логична последица на работата на издавачката куќа, која успеа за само три години да издаде 30 висококвалитени изданија, да внесе раздвиженост на џез-сцената и да потикне нов бран артисти.

Минатата година беше реализирано првото издание на фестивалот „Крај Вардарот Џез“, кое беше еден од најзабележителните и најквалитетни музички настани во земјата за 2020та. И покрај специфичните пандемиски услови, фестивалот остави силен впечаток кај публиката и критиката, но и аманет за продолжување на добрата работа.

Концертот во МКЦ ќе се одржи според актуелните владини мерки во услови на пандемија, посочуваат организаторите на фестивалот.

Видео на денот