Претседателот Стево Пендаровски денеска го завршува учеството на 78. Генерално Собрание на Обединети нации со обраќање на Генерална дебата на тема „Обнова на довербата и повторно стартување на глобалната солидарност: Забрзување на акцијата за Агендата 2030 и нејзините Цели за одржлив развој кон мир, просперитет, напредок и одржливост за сите“.

Како што соопштија од Кабинетот на Пендаровски, обраќањето е предвидено на сесијата што започнува во 15:00 часот по македонско време и може да се проследи во живо на следниот линк.

Претседателот треба да се сретне и со генералниот секретар на ОН, Антонио Гутереш, на која Пендаровски ќе ја одликува Организацијата на ОН со Орден на Република Македонија и ќе му го врачи одликувањето на генералниот секретар Гутереш.

Организацијата на Обединетите нации се одликува со Орден на Република Северна Македонија за големата помош и поддршка при справувањето со последиците од катастрофалниот скопски земјотрес и за непроценливиот придонес за обновата на Градот Скопје, којшто прерасна во град на солидарноста и вистински симбол на пријателството меѓу народите – се вели во соопштението.

Шефот на државата утре ќе отпатува во Чикаго на хуманитарната гала вечера „Патишта кон просперитет“ во организација на бордот на директори на „Македонија2025“ и ќе го одликува главниот извршен директор на Боинг, Дејвид Л. Калхун со Орден „8 Септември“.

Калхун се одликува за неговиот особен и посветен придонес во развојот и унапредувањето на македонско-американските стратешки и деловни односи и за економскиот напредок на нашата земја.