Пендаровски го посети активистот Мисини кој штрајкува со жед во знак на поддршка за лицата без документи
Претседателот Стево Пендаровски утрово го посети активистот Суад Мисини, кој вчера започна штрајк со жед пред Собранието, со цел да им помогне на граѓаните кои имаат проблем со личните документи.
На својот Фејсбук-профил, Пендаровски напиша дека го информирал оти веќе е потпишан Указот на законот со кој се изменува Законот за матична евиденција на граѓаните. Претседателот апелираше до пратениците, кои веќе работат на овој процес, да го завршат што поскоро, бидејќи секој човек има право на достоинствен живот.
Со овие измени им се овозможува на над 600 наши граѓани да ги решат нивните проблеми и да добијат лични документи. Исто така со измените ќе се реши и проблемот со бездржавјанството и на секое дете кое ќе биде родено во земјата затоа што ќе добие извод при раѓање, без разлика дали неговите родители имаат или немаат лични документи. Посебно сакам да потенцирам дека е потребно што е можно поскоро да се направат измени и во Законот за живеалиште и престојувалиште со што ќе се овозможи на уште една ранлива категорија наши граѓани да извадат лични документи, пишува Пендаровски.
На Мисини му порача да продолжи со неговиот активизам, но не на начин што ќе го загрози неговото здравје.