Човекот за кој американските власти велат дека се обидел да упадне на вечерата на Здружението на дописници од Белата куќа со пиштол и со нож, денеска е обвинет за обид за атентат врз претседателот на САД, Доналд Трамп и ќе остане во притвор додека се одвива случајот, објавија светските медиуми.

Кол Томас Ален се појави денеска на суд за да се соочи со федерални обвиненија по хаотичниот инцидент во кој беа испукани куршуми, Трамп беше брзо симнат од сцената, а гостите се криеја под масите. Тој беше уапсен по пукањето во саботата навечер и седеше со своите адвокати за време на краткото појавување во федералниот суд во Вашингтон.

Покрај обвинението за обид за атентат врз Трамп, 31-годишниот Ален се соочува и со две обвиненија поврзани со огнено оружје. Тој не се изјасни за виновен.

Судијата го прифати барањето на обвинителството да го задржи Ален од Торанс, Калифорнија, во притвор до понатамошни сослушувања. Еден од адвокатите на Ален, Тезира Абе, побара сослушување за притвор и истакна дека Ален нема криминално досие.

„Тој се смета за невин во овој момент“, рече таа.

Обвинителите не открија мотив, но во пораката што ја прегледал „Асошиејтед прес“ за која властите велат дека Ален им ја испратил на членовите на семејството неколку минути пред нападот, медиумот известува дека тој се нарекувал себеси „пријателски федерален убиец“, постојано осврнувајќи се на републиканскиот претседател без да го именува и алудирал на незадоволство од низа потези на администрацијата на Трамп.

Истражителите ги сметаат тие записи, заедно со низа објави на социјалните мрежи и разговори со членови на семејството, за еден од најјасните докази за начинот на размислување на осомничениот и за можните мотиви.

Се верува дека Ален патувал со воз од Калифорнија до Чикаго, а потоа во Вашингтон, каде што се пријавил како гостин во хотелот каде што се одржувала свечената вечера, која вообичаено има строги безбедносни мерки, изјави вршителот на должноста државен обвинител Тод Бланш.

„Се чини дека тој навистина имал намера да ги нападне луѓето што работат во администрацијата, веројатно вклучувајќи го и претседателот“, изјави Бланш.

Податоците покажуваат дека Ален е високообразован инструктор и аматерски развивач на видео игри. Профил на социјалните мрежи на човек со исто име, со фотографија што се совпаѓа со осомничениот, покажува дека во последните шест години работел со скратено работно време за компанија што нуди советување за прием на колеџ и подготовка за тестови за потенцијални студенти.;

ВИДЕО | Успешен инженер и наградуван наставник пукал на вечерата на Трамп