„Ова е травестија“: Уметникот Пенушлиски бара да се тргне негова слика од Бугарскиот културен центар

Фото: Телма/принтскрин

Уметникот Илија Пенушлиски јавно бара да се повлече негова слика, која сега е изложена во новиот Бугарски културен центар во Скопје, која е изложена како дел од изложбата насловена „Заедно“.

– Cѐ додека бугарската политиката не престане со примитивните и за нас болно навредливи посегнувања по сржта на нашето постоење, секоја „културна соработка“ ќе биде травестија – пишува Пенушлиски, кој вели дека сликата без негово знаење е изложена во Бугарскиот културен центар.

Еве ја целата реакција на уметникот:

„Во Скопје, деновиве, во новиот бугарски културен центар била отворена ликовна изложба на дела од неколку бугарски и неколку наши сликари. Изложбата е насловена ‘Заедно’.

Се прашувам, која е смислата на оваа изложба? Кого таа го претставува? Во некој нормален свет една ваква изложба би била вообичаен пример за културна соработка меѓу два народа.

Но, со оглед на зацементираниот бугарски став за непостоење на македонската нација, на македонски јазик, па од таму и на македонско сликарство и култура, одговорот се наметнува – за нив, Бугарите, изложбата не може да биде ништо друго освен изложба на дела од бугарски Бугари и македонски Бугари.

А, на таа изложба ме убутале и мене. Со слика што сум ја насликал на Галичката ликовна колонија пред дваесетина години. Од изненадени пријатели дознавам дека моето име стои и на излогот на центарот. Демек, чаршијата да види кој сѐ учествува во овој настан. Ја замолувам Галичката колонија да ја повлечете мојата слика од оваа изложба. Барам бугарскиот центар да го избрише моето име од излогот.

Cѐ додека бугарската политиката не престане со примитивните и за нас болно навредливи посегнувања по сржта на на нашето постоење, секоја ‘културна соработка’ ќе биде травестија“, вели уметникот.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот