Општина Центар затвори градилиште на Водно
Општина Центар затвори градилиште на улица Христо Чернопеев бб на Водно.
– Постапувајќи по службена должност, овластен градежен инспектор на Општина Центар на инвеститорот на објектот му издаде решение за итен прекин на градежните активности и отстранување на градбата. Доколку инвеститорот во предвидениот рок не ја отстрани градбата, истото ќе го стори општината, со што трошоците за извршувањето ќе паднат на товар на инвеститорот – истакна градоначалникот на Општина Центар Горан Герасимовски.
Меѓу другото, Герасимовски упати и апел до сите инвеститори и сопственици на нелегални објекти, да ги почитуваат издадените решенија за отстранување на објекти, затоа што како што истакна, во спротивно, општината присилно ќе ги отстрани, а трошоците за отстранувањето, како што рече, ќе паднат на товар на инвеститорите, односно сопствениците.