Зимските служби на Општина Аеродром од рано утрово се на терен и го чистат снегот од улиците, тротоарите, велосипедските патеки и другите површини кои се под надлежност на Општина Аеродром, информираат од оваа скопска општина.

Уште при првите врнежи, веднаш на располагање беа ставени сопствените возила за чистење снег, а за таа цел се набавени и околу 200 тони сол кој се користи да се спречи појава на голомразица. Активиран е и кризен штаб со кој директно раководи градоначалникот Тимчо Муцунски – информираат од Општина Аеродром.

Од Општината ги потсетуваат и жителите и правните лица дека според Законот за јавна чистота имаат законска обврска да го чистат снегот пред влезовите на своите домови и објекти со што ќе се обезбеди непречен пристап до нив.

Според членот 9 од Законот, одржувањето на јавната чистота во општинска сопственост го врши општината, а на објекти во приватна сопственост и на дворните површини го врши сопственикот на објектот. Општината се грижи за сите жители, пешаците, велосипедистите, како и за безбедно одвивање на сообраќајот во зимски услови. Воедно ги повикуваме граѓаните да ги почитуваат пропишаните мерки за уште поголема безбедност на сите нас – велат од Општина Аеродром.