Официјално: Зајков не е повеќе фудбалер на Левски
Бугарскиот фудбалски клуб Левски одлучи да се раздели со македонскиот репрезентативец Ѓоко Зајков.
Договорот помеѓу клубот и нашиот играч беше раскинат со заеднички договор. Фудбалерот од средниот ред дојде во тимот во летото 2021 година, забележувајќи 16 настапи и еден гол во „синиот“ дрес.
– Раководството и спортско-техничкиот штаб на „ПФК Левски“ изразуваат благодарност до Ѓоко Зајков за посветеноста и професионалниот однос со тимот на „сините“, како и за разбирањето и отстапките што ги направи во врска со тешката финансиска состојба на клуб и му посакуваат добро здравје, лични и професионален успеси – објавија од клубот.
Во својата клупска кариера 26-годишниот дефанзивец играше уште за Работнички, Б тимот на Рен од Франција и белгиската Шарлроа.
За нашата А репрезентација има досега 18 настапи и еден гол реализиран пред две години во ремито со Естонија во Лигата на нации (3:3).