Официјално: Рикиардо ќе го напушти Ф1 тимот на „Мекларен“
Австралискиот возач Даниел Рикиардо ќе го напушти „Мекларен“ на крајот од оваа сезона, соопшти денеска Формула 1 тимот.
Рикиардо беше под договор со Мекларен до 2023 година, но денеска беше потврдено дека двете страни постигнале договор тој да го напушти тимот на крајот од сезоната 2022.
– Ова ќе биде мојата последна сезона со Мекларен. Очигледно дека вложивме многу напор од двете страни, но едноставно не излезе како што сакавме, па тимот реши да направи промена за следната сезона – рече Рикиардо.
Тој пристигна во Мекларен на почетокот на 2021 година, но не успеа да се наметне. Освен победата на Италијанското ГП во 2021 година, 33-годишниот Австралиец е главно во сенка на неговиот клупски колега Ландо Норис.
Рикиардо моментно, пред неделната трка за Големата награда на Белгија, се наоѓа на 12 место во генералниот пласман, додека Норис е седми.