Образование: „Дигитализацијата“ ќе дебитира во прво и во четврто одделение
Учебниците, прирачниците и другите материјалите за учење од прво до трето одделение остануваат во хартиена форма, исто како и лектирите за сите одделенија.
Од први септември наставата ќе почне според новата концепција, со нови наставни програми и материјали за учење. Сега само во прво и во четврто одделение, а потоа етапно и во другите одделенија.
Од Министерството за образование и наука информираа дека учебниците, прирачниците и другите материјалите за учење од прво до трето одделение остануваат во хартиена форма, исто како и лектирите за сите одделенија, додека во четврто и во повисоките одделенија предност ќе им се даде на дигиталните материјали.
Од Министерството соопштија дека наскоро ќе почне дистрибуцијата на учебниците и на другите материјалите за учење за останатите одделенија што ќе работат според старите наставни програми и тврдат дека издавачките куќи навремено ќе ги снабдат училиштата.
Новата концепција беше усвоена во март по четири месеци дебати и полемики. Планот е реформата во деветолетката да се спроведува етапно и целосно да се имплементира во следните пет-шест години. Според стручните служби, кои ја подготвија, придобивките од новата концепција се намален број предмети, нивно интегрирање и можност за учениците да избираат предмети.
Со реформата на основното образование не е предвидена дигитализација на наставата, туку се дигитализираат само материјалите за учење, прецизираат од МОН, со напомена дека дигиталните материјали за учење се глобален тренд и дека со новите наставни програми ќе се овозможи поголемо учество на учениците во реализацијата на часовите.