Нов проблем: Германија го суспендира издавањето на дозволи за Северен тек 2
Германската федерална мрежна агенција привремено го суспендираше издавањето дозвола за гасоводот Северен тек 2, кој го поврзува германскиот балтички брег со Русија. Гасоводот не смее да започне со работа без сертификат на агенцијата, јавуваат германските медиуми.
По деталниот преглед на документацијата, Федералната агенција заклучи дека сертификацијата на оператор може да се разгледа само ако тој оператор е основан според германскиот закон. Седиштето на Nord Stream 2 AG е во Швајцарија и сака да основа филијала во Германија само за германскиот дел од гасоводот, пренесува Москва Тајмс.
Процесот на сертификација ќе остане суспендиран додека швајцарската компанија не го заврши трансферот на средствата во германската филијала и додека Федералната агенција за мрежни активности не може да ги прегледа новодоставените документи за филијалата. Гасоводот со две цевки долг 1.200 километри е завршен и треба да носи руски гас до Германија и други земји.