Секој викенд кафеаните и продавниците во Врање се преполни со Македонци, кои одат на пазарување и во рестораните. На градскиот паркинг нашите граѓани бараат место повеќе, а вообичаено има паркирано и по неколку автобуси на агенциите што организираат еднодневна прошетка. Автобусите кон Врање тргнуваат околу 7 часот наутро, а се враќаат околу 17 часот, а цената е 500 денари. Но, ако сакате од петок да резервирате за сабота, тешко ќе успеете – овој еднодневен излет мора однапред да се испланира, затоа што обично сè е пополнето.

Нашите сограѓани велат дека тешко се доаѓа и до место во ресторан, ако навреме не се резервира.

– Отидов од љубопитство и се изненадив дека едвај најдов место каде да седнам. Ме прашуваа за резервација, не очекував. Искрено, сум имал и поубаво гурманско искуство во некои наши ресторани. Но, ете за промена… Она што го забележав е што таму порциите се многу големи, а цените се слични како нашите, односно малку е поевтино. Ручек за двајца со салата и ракиичка во наши пари ме чинеше околу 1.200 денари. Слушам порано било поевтино и можело нешто да се испазари низ продавниците. Сега, колку што ги видов цените, таму е и поскапо. Поевтино може да се купи месо и видов дека за тоа имаше интерес – го раскажа своето искуство нашиот соговорник.

Туристите во Врање, сепак, раскажуваат дека тамошниот „Лидл“ и пазарот се преполни од нашите сограѓани.

– Повеќе ми е интересно да пронајдам некој нов производ, што го нема тука. Не е нешто до цените… – вели нашата соговорничка.

Апсурдно, но истовремено додека нашите ги полнат продавниците и рестораните во Врање, врањанци доаѓаат во Македонија.

„Двете најсиромашни општини во Пчињската област се Прешево со просечна плата од 59.263 динари и Бујановац со 62.456 динари, а највисоки просечни плати имаат жителите на Врање – 69.427 динари, така што граѓаните од тие општини често одат во Северна Македонија, или во Косово од две причини: да ги полнат цистерните на автомобилите со гориво и да купат цигари и стока што се многу поевтини таму отколку во Србија“, пишува Јужневести.ком.

За овој портал, еден жител од Бујановац изјавил дека оди во Македонија барем еднаш месечно да го наполни резервоарот.

– На 60 литри дизел што го точам, заштедувам речиси 30 евра, па со тие пари си купувам 15 кутии цигари „ротманс“ што овде чини 380 динари, додека во Македонија и во Косово е 20 евра штека – изјавил жителот од Бујановац.

Српскиот портал наведува и дека просечната плата во Македонија е повисока отколку просеците во овие општини на Јужна Србија, но дека цените се пониски.