Израелскиот премиер Бенјамин Нетанјаху во вторник ќе се сретне со претседателот на САД, Џо Бајден, соопштија од кабинетот на израелскиот лидер на 21 јули. Според информациите Нетанјаху се очекува да отпатува за САД утре, понеделник.

Двајцата лидери последен пат се сретнаа во Тел Авив на 18 октомври, непосредно по нападот на Хамас во јужен Израел на 7 октомври, јави РСЕ.

При нападот, милитантите на Хамас, кој е прогласен за терористичка организација од САД и ЕУ, убија повеќе од 1.200 Израелци и земаа околу 240 заложници. Се претпоставува дека околу 116 заложници сè уште се држат во Газа, вклучувајќи и 42-ца за кои израелската војска верува дека се убиени.

По нападот на 7 октомври, Израел започна офанзива во Газа за да го уништи Хамас.

Како резултат на израелските копнени и воздушни офанзиви во регионот, според палестинските здравствени власти, загинале повеќе од 38.000 Палестинци.

Според извештаите на медиумите за најавената средба на Нетанјаху и Бајден, се очекува разговорите да бидат фокусирани на обидите да се обезбеди прекин на огнот во Газа и на можностите за ослободување на заложниците во замена за палестинските затвореници.