Ненад Димитријевиќ: Наша цел е да го поминеме Талин, и да играме на турнирот во Полска
Ненад Димитријевиќ повторно е со македонската кошаркарска сениорска репрезентација. Ги прескокна претквалификациските средби во ноемврискиот и февруарскиот ФИБА „прозорец“ од претквалификациите за Евробаскетот 2025, оние против селекциите на Словачка, Норвешка и Данска. Но, уште на првите тренинзи ново-стариот играч на рускиот Уникс, освојувачот на ВТБ лигата, покажува дека максимално подготвен е да одговори на следните репрезентативни обврски.
Оние кои од 12 до 15 август ќе се играат во Талин, Естонија, а се надеваме дека ќе ги продолжиме и од 16 до 20 август, во Гљивице, Полска. Репрезентативниот бек е запознат со квалитетите на противниците на турнирот во Естонија, макар што во овој момент се непознати играчките ростери на домаќинот, но и на Чешка и Израел.
ОЛИМПИСКИ ПРЕТКВАЛИФИКАЦИИ-ТАЛИН
РАСПОРЕД НА НАТПРЕВАРИТЕ НА МАКЕДОНИЈА
12. АВГУСТ
16.00: Чешка – Естонија
19.00: МАКЕДОНИЈА – Израел
13. АВГУСТ
16.00: Израел – Чешка
19.00: Естонија – МАКЕДОНИЈА
14.АВГУСТ – СЛОБОДЕН ДЕН
15. АВГУСТ
16.00: Чешка – МАКЕДОНИЈА
19.00: Израел – Естонија
Андреј Маслинко: Ќе одиме на победа на секој натпревар во Талин
– Ги знаеме нивните квалитети, знаеме дека ќе играме против сериозни репрезентации. Со Естонија игравме во квалификациите за Европското првенство пред две години. Тоа е силна репрезентација, а ние се спремаме најдобро што можеме. Да пробаме да преминеме во следната рунда од натпреварите – вели Димитријевиќ.
Македонија во овој олимписки претквалификациски циклус, има ростер од искусни но и млади играчи. Може ли да го издржат притисокот на играње на турнирски систем, и дали двете „контроли“ со Полска во Белград овој викенд, се доволни за максимална подготовка?
– Натпреварите со Полска се предвидени токму за тоа, да се подготвиме за тоа што следува, за турнирот во Талин. И се надевам дека ќе бидеме подготвени за оној прв натпревар таму во Естонија – се зборовите на нашиот репрезентативец.
Може ли Македонија да стигне и до турнирот во Полска?
– Целта е да запишеме две победи и да одиме во Полска. За тоа и се подготвуваме. Но ќе одиме од натпревар до натпревар. Мислам дека така е најпаметно да гледаме на работите. Потоа ќе се сконцентрираме на она што следува – смета нашиот организатор на играта.