Шпанецот Чаби Алонсо своевремено важеше за еден од најдобрите играчи за врска во светот, а од денес и официјално го започнува својот прв сениорски тренерски ангажман.

Баер Леверкузен потврди дека Алонсо ќе биде нивниот нов предводник. Во Леверкузен, Алонсо пристигнува на местото на Џерардо Сеоане кој бележеше лоши резултати оваа сезона. Леверкузен очајно ја започна сезоната во Бундеслигата и се наоѓа на 17. позиција, што секако е далеку од амбициите на клубот.

За многумина одлуката на Леверкузен да му даде доверба на Алонсо е изненадувачка со оглед на тоа дека досега нема сениорско тренерско искуство, а освен тоа како играч беше дел од нивниот голем ривал, Баерн Минхен.

„Го познавам клубот, ова е одличен клуб од моето време во Германија. Секогаш Леверкузен имал одлични играчи, па така е и сега. Овој предизвик ме возбудува. Брзо се договоривме и имаме амбициозни цели“, изјави Алонсо.

Во своето скромно тренерско искуство Алонсо го водеше тимот на Реал Сосиедад Б, а една сезона помина и со генерацијата до 14 години во Реал Мадрид. Како играч пет сезони играше во Ливерпул, пет во Реал Мадрид и три во Баерн.