Демократите во Претставничкиот дом на американскиот Конгрес најавија дека ќе се повикаат на прилично нејасен уставен амандман и повторно ќе се обидат да го сменат Доналд Трамп. Овој најнов обид за смена на американскиот претседател доаѓа на помалку од еден месец до изборите што се закажани на 3 ноември.

Планот го презентираше лидерот на демократите во Претставничкиот дом, Ненси Пелоси, која предвидува повикување на уставниот амандман со кој може, иако не е многу веројатно, да се смени претседателот врз основа на проценка за неговата способност да ја води нацијата и на негово место да се постави потпретседателот, Мајк Пенс.

Пелоси најави дека денеска ќе ја достави нивната иницијатива за активирање на 25-тиот амандман од американскиот Устав, но шансите демократите да успеат да го сменат Трамп на ваков начин се научна фантастика, бидејќи покрај двата Дома на Конгресот со ваквиот развој на настаните мора да се согласи и потпретседателот Пенс.

Главниот аргумент на Пелоси всушност е прашањето „дали Трамп е ментално подготвен” да управува со земјата поради лековите што ги прима како дел од терапијата со ковид-19.

– Претседателот, така да кажеме, сега е во друга состојба. Јас немам одговор на таквото однесување. Постојат луѓе кои велат дека кога сте на стероиди или ковид-19, може да имате одредено нарушување во размислувањето, изјави Пелоси за телевизијата „Блумберг“.