На Нинџа му се заканувале во затворот и се чувствувал несигурно, тврди неговиот адвокат
Адвокатот Sвонко Давидовиќ, по судењето на кое Александар Василевски-Нинџа, осуден за „27 април“, го тужи портпаролот на ВМРО-ДПМНЕ Наум Стоилковски за клевета, изјави дека пресудата за упадот во Собранието не е донесена врз база на исказот од тужителот. Тоа е причина поради која ја поднеле тужбата.
„Сакам да се разбере затоа што гледам дека има недоразбирање околу она што е предмет на спорот. Ние за 27 април многупати кажавме дека пресудата е менлива и дека таму се злоупотребени правата на обвинетите и дека се судени за исти настан во четири различни групи, каде што луѓето навистина добија огромни казни, и тоа е неспорно. Но во конкретниот случај не се работи за тоа. Во конкретниот случај се тврди дека таа пресуда е донесена само врз основа на исказот на сведокот Александар Василевски-Нинџа, што не е точно, затоа што тој бил обвинет и не е сведок и има право да се брани како што сака, а во својот исказ не спомна ниту едно лице. Значи тој ја даде својата одбрана, а пресудата на илјада и нешто страници е базирана на 36 сведоци, куп други материјали и воопшто не тврдиме дека е исправна“, вели Давидовиќ.
„Второ, тие 211 години не се поради исказот на Нинџа, туку поради обвинението и начинот на работење на судијата којшто го пресуди предметот. Но од друга страна, ако бараме навистина да се запазат правдата и правниот систем факт е дека Александар Василевски – Ниџа не дал таков исказ, дека пресудата не е базирана на неговите искази, а со самото тоа му се загрозува безбедноста затоа што луѓето кои се осудени, како што и кажа сам, да го цитирам, ‘симпатизерите на ВМРО’ можат да помислат дека истиот е клучен за таквата пресуда, што не го става во позиција каде што би се чувствувал комотно и пријатно, ниту тој ниту неговото семејство. Затоа ви потенцирам, овде се работи за клевета, за ништо друго. Предметот како предмет е еден и за него многу сме зборувале и пишувале, но да се тврди дека еден човек е одговорен за судбината на другите обвинети, во ситуации каде има куп материјални докази, куп сведоци и едно несовесно работење, едно чудно работење на судечкиот судија е навистина некоректно“, додаде Давидовиќ.
Адвокатот бара одговорност од Стоилковски. За неговиот клиент вели дека „има општо закани и се чувстувува несигурен, а затоа и беше пренесен од затворот „Штип“ во затворот „Скопје“.“
„Токму сега тоа ви го објаснив, како поборници на право и правна држава требаше да поднесеме, затоа што овде, да утврдиме, не бараме вина, овде бараме одговорност за нанесена клевета. Клеветата е, повторувам, дека врз основа на исказот на Александар Василевски-Нинџа е донесена пресуда и луѓето се осудени на 211 години, второ дека се пазарел поради таа своја изјава и е помилуван, а не е помилуван“, додаде Давидовиќ.