Ден спроти одбележувањето на 13-годишнината од катастрофалниот земјотрес и цунамито во Јапонија што предизвикаа хаварија во нуклеарната централа Фукушима даичи, предложена е комбинација од две методи за отстранување на радиоактивното гориво од реакторите.

Енергетската компанија ТЕПКО предложи отстранување на горивото и радиоактивната конструкција што се изложени на воздух, како и зацврстување на радиоактивните делови со „пополнувач“.

Во реакторите 1, 2 и 3 има вкупно 880 тони гориво и друг радиоактивен материјал, кој мора да биде отстранет за конечно да биде запечатена централата, до средината на идната деценија.

Во реакторот број 3 операцијата може да се спроведе со роботизирано возило што би издржало во толку сурови услови. Додека не се отстрани радиоактивниот материјал, во реакторите ќе се уфрла вода заради ладење и намалување на зрачењето.

Земјотрес со магнитуда од 9,1 Рихтери на 11 март 2011 година го потресе источниот брег на Јапонија и предизвика цунами со бранови високи и до 40,5 метри. Цунамито го уништи системот за ладење на реакторите во нуклеарната централа Фукушима Даичи. Потврдена е еден смртен случај како последица на радијацијата (од рак на бели дробови во 2015 година), а шест лица изложени на радијација страдаат од леукемија.

Поради хаваријата беа евакуирани повеќе од 164.000 луѓе што живееле близу нуклеарната централа.

Јапонија денеска им изразува почит и на жртвите од земјотресот и цунамито. Загинаа вкупно 19.759 луѓе, а уште 2.553 се’ уште се сметаат за исчезнати.