На денешен ден е роден кошаркарскиот романтичар Мирза Делибашиќ
На денешен ден во 1954 година во Тузла, роден е Мирза Делибашиќ, популарниот „Кинѓе“ и еден од најдобрите европски кошаркари на сите времиња и вистинска легенда на југословенската кошарка.
Мирза Делибашиќ во легендите влезе со екипата на Босна со која стана европски шампион, а тимот од Сараево стана првиот клуб од поранешната СФР Југославија кој го подигнал пехарот од најелитното кошаркарско клупско натпреварување во Европа.
Два пати со Босна ја освојуваше титулата и во силната југословенска лига, а во 1980 година е прогласен за најдобар кошаркар во СФР. Со репрезентацијата на СФР Југославија има златен медал од Олимписките игри 1980 година, од Светското првенство 1978 година, а има и две титули од Европските првенства (1975 и 1977).
Во 1980 година ја започнува интернационалната кариера и тоа во Реал мадрид каде и денеска го има статусот на легенда и еден од најдобрите кошаркари во историјата на „кралскиот клуб“.
Дресот на репрезентацијата на СФРЈ го носеше 176 пати и постигна 1.759 поени. Во 2000 година е прогласен за најдобар спортист на сите времиња во БиХ.
Делибашиќ беше селектор на репрезентацијата на БиХ која на ЕП 1993 година го освои осмото место, што се уште е најдобар пласман на Европските првенства за Босанците. Мирза Делибашиќ почина во Сараево на 8 декември 2001 година.