МЗТ Скопје Аеродром обезбеди плеј-оф во АБА2 лигата
Македонскиот претставник го доби дуелот, еден од оние кои мораше да се добијат, против хрватската Горица денеска со резултат 77:73.
И со скор од седум победи и пет порази, на едно коло пред крајот на регуларниот дел, МЗТ обезбеди една од првите осум позиции кои водат во доигрувањето за места преку кои се влегува во првата лига на Јадранот.
Први стрелци во победничките редови беа Мекиќ со 16 поени, Крстевски 14 и Тарнер 13, додека Д. Стојановски додаде 10. На спротивната страна 15 коша беа дело на Баковиќ, еден помалку имаше Калајџиќ, а 10 Љубичиќ.
Ова беше 12 натпревар за „металците“ во АБА 2 лигата, по кој се на ефект од седум победи и пет порази. Последниот од регуларниот дел од регионалното натпреварување, ќе го играат на 28 март (недела) од 13.00 часот, а противник им е екипата на Златибор.
Вечерва, од 21.00 часот, вториот наш претставник во оваа јадранска конкуренција, екипата на Работнички игра против словенечкиот Хелиос.