Мурињо ги одбил Селтик, Рома и Валенсија…
Шкотските медиуми објавија дека Селтик за нов менаџер го сака Жозе Мурињо, но добиле негативен одговор и не се единствен тим кој добил корпа од Португалецот.
На навивачите и на управата на Селтик многу тешко им падна тоа што најголемиот ривал Ренџерс ја освои титулата и им ја прекина деветгодишната доминација и планираат експресно да возврат наредната сезона. Бидејќи на клупата на Ренџерс седи поранешниот капитен на Ливерпул, Стивен Џерард, во Селтик сакаа да одговорат со Жозе Мурињо, а оваа вест ја потврди и новинарот Данкан Касл.
– Моите информации велат дека Селтик ги направил првите потези веднаш откако Ренџерс предводен од Стивен Џерард на убедлив начин ја освои титулата. Сакаа големо име на клупата кое ќе ги врати на врвот, меѓутоа како што сфатив, одговорот на Мурињо бил дека добил и други понуди, но сега не е подготвен да тренира ниту една екипа – објаснува Касл.
Наводно понуда до Мурињо доставиле и Рома и Валенсија, но и италијанскиот и шпанскиот тим исто така добиле негативен одговор.
Мурињо моментно е без работа откако во понеделникот доби отказ во Тотенхем.