Мултимедијална кампања „Прозорците што се смеат“
Театар „Пи“ во соработка со „Порака“ – Скопје на Меѓународниот ден на лицата со попреченост, 3 декември, ја почна мултимедијалната кампања со наслов „Прозорците што се смеат“. Фокусот на проектот е да се развие разбирање за тешкотиите со кои ранливите групи се соочуваат кога се обидуваат да го изразат својот глас во општеството. „Кај нив, во изминатиов период, како и кај сите граѓани, е намалена комуникацијата, социјализацијата, самостојноста во извршување на сите активности. Ваквата состојба предизвикува и лицата со попреченост да станат поранливи, да се јави чувство на осаменост, која носи и други последици“, велат од Театар „Пи“.
Проектот почна со изложба на уметнички инсталации на плоштадот „Филип Втори“, кои Театар „Пи“ ги подготви заедно со лицата со попреченост, а ќе продолжи на 18 декември со онлајн музички концерт и онлајн документарен филм. Проектот е поддржан од Град Скопје и Делегацијата на Европската Унија, а концептот и режијата се на Македонка Илиевска и Златко Митрески.
(Текстот е објавен во „Културен печат“ број 59, во печатеното издание на „Слободен печат“ на 5-6 декември 2020)