Агенцијата Фич сигнализираше дека би можела да го намали кредитниот рејтинг на САД „ААА“ доколку Белата куќа и Конгресот не постигнат договор во наредните денови за зголемување или суспендирање на плафонот на долгот. Министерството за финансии на САД постојано предупредуваше дека може да има проблеми со исполнувањето на финансиските обврски уште на почетокот на јуни. Преговорите меѓу администрацијата на претседателот Џо Бајден и републиканците во Претставничкиот дом влегоа во ќорсокак, а до истекот на рокот останаа само седум дена. Од „Фич“ велат дека би можеле да го намалат рејтингот на САД доколку навреме не го подигнат плафонот на долгот или не го суспендираат, пренесува Хина.

„Фич сè уште очекува договор за лимитот на долгот да биде постигнат пред „датумот X““, се вели во извештајот на агенцијата. „Сепак, веруваме дека постојат зголемени ризици дека плафонот на долгот нема да биде подигнат или суспендиран пред „датумот X“, така што владата може да почне да го пропушта подмирувањето на некои обврски“, се додава. Отсуството на договор „би било негативен сигнал за поширокото управување и подготвеноста на САД навреме да ги исполнат своите обврски“, а малку е веројатно дека тоа би било во согласност со рејтингот „ААА“, забележува Агенцијата. Тие проценуваат дека американската влада ќе потроши повеќе отколку што заработува, што ќе резултира со дефицит од 6,5 проценти од БДП оваа година и 6,9 проценти во 2024 година. Предупредувањето на „Фич“ потсетува на 2011 година и тогашниот конфликт околу зголемувањето на плафонот на долгот, што ја натера агенцијата „Стандард и Пурс“ да го намали рејтингот на САД на „АА+“