Иако српските медиуми објавија дека се е договорено и Саво Милошевиќ ќе биде новиот тренер на Партизан, поранешниот српски репрезентативец во последен момент се премисли и не ја прифати понудата.

Управата на „црно-белите“ експресно реагираше и го назначи Гордан Петриќ за нов тренер.
Тој на тренерското столче ќе го замени Илија Столица, кој поради катастрофални резултати, вчера доби отказ.

Столица за последен пат го предводеше тимот вчера, кога Партизан беше елиминиран од АЕК од Ларнака во третото коло од квалификациите за пласман во Лигата на Европа.

Петриќ (53) во текот на својата играчка кариера двапати играше за Партизан, а беше играч и на ОФК Београд, Данди Јунајтед, Ренџерс, Кристал Палас, АЕК и Хартс.

⚽️ Gordan Petrić 👏👏 pic.twitter.com/fIRhIuaB9r

— FK Partizan (@FKPartizanBG) August 12, 2022

Тренерската кариера ја започна во Бежанија во 2013 година, а потоа работеше и во екипите на Синѓелиќ, Земун, Чукарички, Рад, грчки АЕЛ и словенечка Горица.

Негов помошник ќе биде и поранешниот фудбалер на Партизан Алберт Наѓ, а промоцијата на новиот тренер е закажана за в сабота во 16 часот.

Партизан во недела во Нови Сад ќе го одигра натпреварот од шестото коло од српската Суперлига против Младост ГАТ.