За начинот на кој оваа година ќе се слави Божиќ во Грција, телефонски разговарале грчкиот премиер Кирјакос Мицотакис и поглаварот на грчката православна црква, архиепископот Јеронимос, јави дописничката на МИА од Атина.

Од кабинетот на Мицотакис соопштуваат дека за време на разговорот станало збор „за текот на пандемијата во земјата и за начинот на кој ќе се прослави Божиќ во овогодинешните посебни услови” и додаваат дека во следните денови ќе има и официјални соопштенија.

Телефонскиот разговор го најави портпаролот на грчката Влада Стелиос Пецас на брифингот со новинарите во понеделникот, а се очекува до крајот на неделава, да  бидат соопштени и одлуките за работата на црквите, фризерските салони и продавниците за малопродажба што се затворени поради карантинот.