Кошаркарите на МЗТ СКопје продолжуваат со одличните настапи во АБА2 лигата и ја остварија четвртата победа во петте кола.

На третиот турнир сезонава, кој се игра во Сараево, „металците“ со пресврт го совладаа Хелиос со 94:88 и ја забележаа третата победа по ред со која се втори на табелата, веднаш зад лидерот Борац Бања Лука кој нема пораз досега.

Во првото полувреме, „металците“ само еднаш беа во водство и тоа на почетокот (2:0),  по што контролата над резултатот ја презедоа играчите на Хелиос. Најголемата негатива на МЗТ Скопје во првата четвртина изнесуваше минус седум (15:22), додека на одмор се замина со двоцифрена негатива (35:45).

Третата четвртина започна со поени на Хелиос кој поведе со 35:47. Но, од тие моменти „металците“ заиграа далеку подобро и направија серија од 8:0 со која ја вратија резултатската неизвесност (43:47). До крајот на третиот дел, „металците“ се обидуваа да дојдат до израмнување но не успеаја и по 30 минути игра резултатот беше 61:64.

Избраниците на Дарко Радуловиќ фуриозно ја започнаа последната четвртина, со серија 10:0 од кои осум постигна Вер, поведоа со 71:64  и предноста не ја испуштија до крајот за конечни 94:88 и четврта победа сезонава во АБА2 лигата.

Дастин Вер со дабл-дабл од 23 поени и 13 асистенции беше најдобар кај МЗТ Скопје, а се истакнаа и Адем Мекиќ со 20 поени и девет скокови и Рикиќ со 21 поен и осум скока. Кај Хелиос пак со 20 поени најефикасен беше Ферме. Наредниот натпревар во АБА2 лигата, МЗТ Скопје ќе го игра за два дена против Спарс Сараево.