Рускиот ас Данил Медведев продолжува со одличните настапи на стартот од новата сезона, обезбедувајќи место во осминафиналето на Австралија опен по вистинска тениска драма во Мелбурн. Трикратниот финалист на турнирот направи голем пресврт и го елиминираше Фабиан Марожан со 3-2 во сетови (6-7, 4-6, 7-5, 6-0, 6-3) по речиси четиричасовна исцрпувачка битка.

Мечот започна неочекувано лошо за Медведев, кој ги загуби првите два сета и се најде пред рана елиминација. Унгарскиот тенисер играше инспирирано и со брејк на стартот од третиот сет најави можна сензација. Сепак, токму во тие моменти Медведев го покажа менталниот квалитет и искуството, експресно возврати со рибрејк, а во финишот на сетот го наметна својот ритам и го доби со 7-5, што се покажа како клучен момент на натпреварот.

По тој пресврт, Русинот целосно ја презеде контролата. Во четвртиот сет беше апсолутно доминантен, не му препушти ниту еден гем на противникот и за само дваесетина минути израмни на 2-2. Во одлучувачкиот сет Медведев рутински ја комплетираше победата, додека Марожан очигледно немаше сила да парира.

Бројките зборуваат сами за себе, 19 аса и дури 48 винери за рускиот тенисер, кој по петти пат во кариерата се врати од негатива од 0-2 во сетови. Овој триумф е силна најава дека Медведев повторно се движи кон врвот и враќање меѓу најдобрите десет на АТП-листата. Во осминафиналето го очекува пресметка со талентираниот Американец Лернер Тиен.