Маж починал на летот од Бангкок за Минхен, потврдија патниците. Германскиот државјанин, за кој се вели дека имал 63 години, му станало лошо откако тој и неговата сопруга се качиле во авионот на Луфтханза во четвртокот, велат очевидци.

Човекот почнал да се поти и имал проблеми со дишењето, но неговата сопруга му рекла на екипажот дека е подготвен за летот и всушност е само уморен затоа што морал да трча за да стигне до таму, се вели во извештаите. Мартин Мисфелдер, патник во авионот, рече дека состојбата на човекот нагло се влошила веднаш по полетувањето и тој почнал да плука крв.

Тој додаде дека несреќниот човек потоа почнал да крвари од устата и носот. „Тоа беше апсолутен хорор, сите врескаа“, изјави тој за швајцарскиот весник Блик. Тој тврди дека човекот искашлал „литри крв“ и дека ѕидовите на авионот биле испрскани, пренесува Скај њуз.

Стјуардесите поминале околу 30 минути обидувајќи се да го реанимираат мажот пред да биде прогласен за мртов. Авионот Ербас А380 потоа се вратил во главниот град на Тајланд откако поминал само час и половина во воздух. Инаку, летот од Бангкок до Минхен трае 12 часа.

Мисфелдер изјави за Блик дека настанал „хаос“ кога авионот слетал. Според него, најлошо било да се види како сопругата на починатиот поминувала низ царина и ги извршувала сите формалности. Луфтханза соопшти дека сите патници биле префрлени на алтернативни летови за патување кон дома.

„Иако екипажот и лекарот во авионот веднаш презедоа сеопфатни мерки за прва помош, патникот почина за време на летот. Нашите мисли се со роднините на починатиот патник. Жалиме и за непријатностите што ги имаа патниците на овој лет“, заклучи авиокомпанијата.