Младиот македонски тенисер Марко Алексовски триумфираше на турнирот Битола Опен за тенисери и тенисерки до 14 година, што изминатиов викенд заврши во Битола. Турнирот беше од трета категорија, а победникот до триумфот стигна на убедлив начин.

Алексовски во првите три меча загуби само по еден гем, а во финалето и полуфиналето на ривалите и препушти по четири гема или вкупно на турнирот во пет меч загуби само 11 гема.

Во финалето нашиот тенисер го совлада Николај Потер од Србија со 2:0 во сетови (6:1, 6:3), додека во полуфиналето беше подобар од Петар Травица од Србија со 6:4 и 6:0.

Во четвртфиналиот меч триумфираше над Стелијан Даракев од Бугарија со 6:1 и 6:0, а претходно ги победи Ѓорѓе Адамовиќ (Србија) со 6:0 и 6:1 и Петрос Бицакос (Грција) со 6:1 и 6:0.

Турнирот кај момчињата помина во знак на македонските тенисери откако турнирска победа во конкуренција на двојки изборија Марин Стефановски и Иван Трповски. Тие во финалето ја победија македонско-германската комбинација Марко Алексовски – Максимилијан Хајцик со 7:6 (5) и 6:3.

Оваа недела се одржува уште еден турнир во Македонија за тенисери и тенисерки на возраст до 14 години – МТП Опен 2025.