Манифестацијата „Глумците пеат“, која минатата година триумфално се врати на театарската сцена, поради големиот интерес на публиката годинава ќе се одржи во две вечери, на 29 и 30 март во Националната опера и балет.

Покрај дводневниот формат, манифестацијата има и тематска одредница. Организаторите одлучија тоа да биде „Евровизија“ и што би се случило ако изборот се одржи кај нас. Познати евровизиски хитови, домашни и странски, ќе изведат актери од сите театри во земјава.

Режисер и годинава е Дејан Пројковски, кореограф е Олга Панго, дигирент Љупчо Мирковски, a Бобан Мирковски e автор на аранжманите наменски напишани за сите песни кои ќе бидат изведени. На сцена ќе бидат 40 актери и 22 члена во оркестарот, а во целата продукција се вклучени околу сто луѓе.

Маја Бабиќ од „Баги комуникации“, ќерка на актерот Марин Бабиќ – идејниот творец и организатор на „Глумците пеат“ – на наменски одржана прес-конференција изјави дека шоуто оваа година ќе трае околу два и пол часа и се обидуваат да го вратат настанот онака како што Марин замислувал да го направи.

Таа рече дека „Глумците пеат“ е најголема продукција во државава и платформа која им овозможува на актерите да излезат од својата комфорна зона, од своите театри, и да имаат целосна слобода да ја креираат својата точка и да соработуваат со колеги со кои можеби ќе немаат можност во текот на кариерата. Особено ова е шанса за младите актери „да ги добијат своите пет минути“ за да се промовираат. За концептот на настанот рече дека е еден вид приказна со смислена тема која се провлекува низ целото пеење.

Според режисерот Пројковски, „Глумците пеат“ е „фабрика за производство на забава“. Манифестацијата не се занимава со ретроспектива, со историјатот на „Евровизија“, бидејќи целта не била да се изберат најдобрите песни од тој натпревар.

– Она што е интересно кај „Глумците пеат“ е дека има еден натпревар кој ќе биде покреативен, бидејќи само добрата изведба на песната тука не значи ништо. Ние сме фабрика за производство на забава и тоа ни е основната тема. Ние си ги одбираме песните преку коишто можеме да ја создадеме забавата. Така што, нашиот избор на песни не е наш однос кон песните дали се добри или лоши – рече Пројковски.

Организирањето на „Глумците пеат“ е поддржано од неколку спонзори, а манифестацијата првпат доби поддршка и од Министерството за култура. Билетите за двете вечери се распродадени. Иако интересот е голем, засега тимот не размислува шоуто да го пресели во спортска сала.

– Ова е, сепак, прослава на театарот. Се надевам дека конечно ќе ни направат концертна сала каде што ќе има барем 1500 седишта за да може квалитетно да ја направиме продукцијата – истакна Бабиќ.