Манчевски за 5Г мрежата: Лажните вести имаат непроценлива штета, особено во вонредни ситуации
Ги повикуваме сите извори на лажни вести, да престанат со објавување на дезинформации кои имаат единствена цел да создаваат недоверба и паника кај граѓаните, напиша Манчевски на Фејсбук.
Ги информирам граѓаните дека во нашата држава нема пуштено во употреба 5Г мрежа и дека надлежните институции немаат спроведено постапка за доделување на фрекфенции за 5Г мрежа. Од тука сите грижи за ефектите од 5Г мрежата врз здравјето на граѓаните се неосновани, напиша министерот за информатичко општество Дамјан Манчевски.
-Информациите кои се појавија во јавноста, дека деновиве се прават тестирања се неточни. Во нашата држава досега се направени само две тестирања и тоа, едно во 2018 година во органичени и строго контролирани лабараториски услови, и второ тестирање во 2019та година, на ограничен простор. Ги повикуваме сите извори на лажни вести, да престанат со објавување на дезинформации кои имаат единствена цел да создаваат недоверба и паника кај граѓаните. Исто така, апелираме сите граѓани внимателно да бираат од каде се информираат и да ги проверуваат изворите на информации- напиша Манчевски.
Лажните вести имаат непроценлива штета, потенцира Манчевски, особено во вонредни ситуации како што е оваа со коронавирусот и кај нас и во светот, и одговорноста е на сите нас да придонесеме кон намалување на ризиците. Тоа може да го направиме само ако сме доволно и точно информирани, од релевантни и проверени извори.