Малку фалело Роналдо и Меси да играат заедно во Барселона
Поранешниот претседател на Реал Мадрид, Рамон Калдерон, тврди дека во 2009 година Барселона била на чекор да формира неверојатен тандем, Кристојано Роналдо – Лионел Меси.
Калдерон во разговорот за арапската телевизија Ал Мајаден открива како потпишал договор со Роналдо и колку малку фалело трансферот да биде упропастен поради менаџерот на Манчестер јунајтед, сер Алекс Фергусон.
Имено, Фергусон го мразел Реал Мадрид и поради тоа го понудил Португалецот на најлутиот ривал, Барселона.
– Со години работев на трансферот на Роналдо во Реал Мадрид и кога конечно договоривме, а јас потпишав преддоговор со Роналдо, сер Алекс Фергусон го понуди на Барселона. Фергусон тоа го направи бидејќи го мрази Реал Мадрид. Смета дека Реал е клубот кој го попречува Јунајтед да стане најголем фудбалски клуб на светот – открива Калдерон.
Според поранешниот претседател на „кралскиот“ клуб, до таков трансфер не дошло само поради Кристијано Роналдо.
– Барселона беше одушевена од предлогот на Фергусон и веднаш тргна по него. Но, Роналдо не сакаше да слушне за таков трансфер, им кажа дека има обврска кон мене и Реал Мадрид и дека нема пари за кои би го прекршил ветувањето – вели Калдерон.
Тој исто така открива дека не бил само дадениот збор пречка за трансфер во Барселона.
– Се уште го чувам документот на кој се наоѓаат мојот и потписот на Роналдо со кој потврдуваме дека доколку некоја страна го прекрши договорот за премин во Реал Мадрид, на другата странка ќе мора да и плати 30 милиони евра.
На крајот Роналдо заврши во Реал Мадрид со кого освои четири титули во Лигата на шампионите пред да потпише за Јувентус во 2018 година.