МАКЕДОНСКИ ФИЛМ во хорор-жанр: Нашата митологија содржи многу фантастични ликови и суштества
Краткометражниот игран филм „Сонот за крвта и душата“ во режија на Игор Алексов неодамна ја освои наградата за Најдобар интернационален краток хорор-филм на шестиот Интернационален независен филмски фестивал за краток и игран филм „Денот е краток“ во Венецуела.
Најтесниот избор на кратки филмови, во категотијата во која бил прикажан „Сонот за крвта и душата“ на Игор Алексов, на фестивалот „Денот е краток“ во Венецуела бил составен од филмови од САД, Грција, Германија и Малта. Приказната во македонскиот филм, во која ликот Марко е вампир, почнува кога тој од сон се буди пред зајдисонцето.
Од каде се појави интересот за хорор-жанр, кој кај нас е реткост?
– Отсекогаш сум сакал да работам филмови кои се исполнети со фантазија, а хоророт како жанр содржи многу фантазија. Кога се зачнуваше идејата за „Сонот за крвта и душата“ со авторот Александар Русјаков прво зборувавме за жанрот и одлучивме да искористиме дел од македонската митологија, која е многу богата и содржи многу фантастични ликови и суштества. По обемното истражување, научивме дека вампирите најмногу се застапени во нашата митологија и оттука почна да се развива идејата. После повеќе различни идеи, дојдовме до главната идеја, а потоа приказна почна сама да се отклопува.
На колку фестивали досега беше прикажан филмот и што лично ти значи наградата во Венецуела?
– Досега „Сонот за крвта и душата“ е прикажан на шест фестивали, од кои три се во Јужна Америка. Секоја награда многу значи за секој автор, без разлика колку е голем или мал фестивалот. Тоа е еден вид признание за трудот на целата екипа. Ние самите сме задоволни како го направивме овој краток филм и наградата е само потврда за тоа.
Филмот е во продукција на „Квазар Филм“. Режијата е на Игор Алексов, a сценариото го напиша Александар Русјаков. Главните улоги ги толкуваат Дејан Лилиќ, Јордан Симонов, Нина Деан и Ана Стојановска. Директор на фотографија е Душан Кардалевски, сценографијата ја изработи Влатко Зафирковски, костимите се на Раде Василев, а маската е на Горан Игњатовски.
За кастингот се погрижи Катерина Грубиќ. Дизајнот на звукот е на Дарко Спасовски и Горан Керкез. Музиката е на Дарко Спасовски. Анимацијата ја изработи Александар Стојановски. Монтажата е на Блаже Дулев, кој воедно е и продуцент на филмот. Македонската премиера на „Сонот за крвта и душата“ се одржа на фестивалот „Синедејс“ во 2018 година.
(Текстот е објавен во „Културен печат“ број 23, во печатеното издание на „Слободен печат“ на 21-22 март 2020)