Добитничка на наградата „Радојка Вранчич“ за млади книжевни преведувачи во Словенија, што ја доделува Друштвото на словенечки книжевни преведувачи од 2002 година, е македонистката Маја Ковач. Наградата таа ја доби за одличниот препев на целокупниот поетски опус на скопската поетеса Даница Ручигај (1934 – 1963), објавен во книгата „Srebrne nočne igre in Ujetniki vetra“ во 2022 година за „КУД Полице Дубове“.

Наградата ѝ беше врачена на 28 ноември, на јубилејниот 40. Словенечки саем на книги, на кој беа одбележани и сто години од раѓањето на поетот Иван Минати, инаку најпродуктивниот препејувач на македонската поезија во 20. век.

– Маја Ковач успешно се движи низ поезијата, која е мешавина на интимизмот и модернизмот, без да подлегне на претерано поедноставување или „подобрување“, од една страна, ниту на претеран херметизам, од друга страна. Препевот е читлив и течен, освен на места кога не треба – кога и оригиналот е полн со елипси, необични синтаксички структури, измешани зборови. Препејувачката успешно го открива и пресоздава сето ова на јазик кој е природен токму толку колку што бил природен јазикот на оригиналот – а зад сето ова стои посветената работа на запознавање со македонскиот книжевен контекст – стои во образложението на стручната комисија за наградата „Радојка Вранчич“.

Истакнатата македонистка во Словенија, Намита Субиото, посочува дека до сега Друштвото на словенечки книжевни преведувачи доделило две награди за преведувачи и препејувачи од македонски јазик, и тоа награда „Антон Совре“ за најдобрите преводи (што се доделува од 1963 година) на Иван Минати во 1972 година за препевот на поезијата на Кочо Рацин и на Вено Тауфер во 1975 година за препевот на поезијата на Влада Урошевиќ.

(Текстот е објавен во „Културен печат“ број 259, во печатеното издание на весникот „Слободен печат“ на 7-9.12.2024)