Според настаните на теренот во арената „Борис Трајковски“ – Скопје не можеше да има поинаков епилог на вториот натпревар на 45 издание на традиционалниот турнир „Бранко Хаџииљоски – Чајка“.

И репрезентацијата на Словачка славеше над Црна Гора со 3:0 (25:18, 25:17, 25:15) со беспрекорна игра во којашто проработеа сите елементи на составот на селекторот Марек Кардош.

Словаците забележаа 12 блока повеќе, со асови остварија позитива од четири поени, а девет со напад, беа одлични во реализација на контрите, така што Црна Гора немаше шанса да го поправи впечатокот од вчерашниот пораз од Македонија.

Коректорот Михаловиќ беше најефикасен со 14 поени, примачот Кришко заврши со 11, Патак и Крајчовиќ освоија по девет, центарот Мачуха осум, а техничарот Гоч девет. 

Во третопласираната селекција на турнирот (Израел го откажа учеството поради ковид-19 случаи во својот состав), Црна Гора, Чулафиќ стигна до девет, Бојиќ седум, а Чачиќ шест поени.

В недела од 20.00 часот нашите најдобри одбојкари ќе играат со Словачка, а победникот ќе го освои првото место на меморијалот.