Лопетеги доби отказ после дебаклот против Борусија Дортмунд
Хулен Лопетеги повеќе не е тренер на Севиља, објави шпанскиот клуб на својата официјална веб-страница после високиот пораз во Лигата на шампионите.
Борусија Дортмунд ја победи Севиља на гости со 1:4, а раководството на андалузискиот клуб очигледно го смета Лопетеги за одговорен за овој пораз, но и за генерално слабите игри сезонава.
– Претседателот и потпретседателот потврдија дека повеќе не сум тренер на Севиља. Тоа беа три историски, спектакуларни години, трипати игравме во Лигата на шампионите. Не почнавме добро оваа сезона и тие донесоа одлука што морам да ја прифатам, дури и ако не ми е по волја – рече Лопетеги по мечот со Дортмунд.
Шпанските медиуми со денови шпекулираат дека на клупата на Севиља ќе се врати Хорхе Сампаоли.
Лопетеги со Севиља успеа во сезоната 2019/2020 да ја освои Лига Европа, а беше поразен во УЕФА Суперкупот од Баерн Минхен.