Локални избори 2021: Аеродром „ќе крцка“ од нови катни гаражи, паркови, градинки, киносали…

Зелен плоштад Аеродром, Фото: Град Скопје

За градоначалник на скопската општина Аеродром, функција што во последните четири години ја имаше Златко Марин од СДСМ, се натпреваруваат петмина кандидати. Дипломираниот економист и поранешен пратеник од редовите на СДСМ Александар Филиповски, за главен ривал во Аеродром го има 32-годишниот Тимчо Муцунски. Муцунски е кандидат на ВМРО-ДПМНЕ и нејзините коалициски партнери, а е доцент по римско право на Правниот факултет „Јустинијан Први“ при УКИМ во Скопје. Довербата на аеродромци на 17 октомври ќе ја бараат и атлетската репрезентативка Весна Кираџиева од политичката партија Левица, Билјана Аврамоска-Ѓореска, дипломиран правник од Коалицијата ЛДП-ДПМ – Движење „Одлучно за промени“, како и Миле Петковски од Трајно македонско радикално обединување – ТМРО.

Кандидатот на СДСМ и коалицијата Александар Филиповски ветува дека, ако стане градоначалник, во општината ќе има 3.000 нови паркинг-места, односно повеќе од 12 катни гаражи, како и нови зелени површини и разубавување на постојните, две нови градинки и младински центар.

– Сервисните улици, пешачките зони и плочници повторно ќе се мијат со цистерни, со што ќе добиеме почисти јавни површини. Аеродром ќе биде општина – дом за сите генерации. Затоа што планираме младински центар, но и активни центри за највозрасните. Ќе изградиме сензорни соби, со цел еднакви шанси и за учениците со попреченост, ќе ги подобруваме сервисните улици, но и ќе правиме 20 километри нови велосипедски патеки – истакна Филиповски во едно од своите предизборни претставувања.

Неговиот политички ривал Муцунски најави реализација на четири нови градинки, со „нула трошок“ за родителите, кино, театар, читална, забавен парк, современа, модерна и урбана општина, како директна помош од Словенија за пристап до европските фондови.

– Додека власта нè навредуваше, во Љубљана постигнавме договор за директна словенечка помош за пристап до европски фондови за Општина Аеродром. Ние внатре во државата сме опозиција, но надвор работиме единствено и само во интерес на секој од вас. Навредите и клеветите се одраз на немоќ и незнаење – порача Муцунски. Тој пред аеродромци вети дигитализација на општината преку проектот наречен „Смарт Аеродром“.

Аврамоска-Ѓореска од движењето на ЛДП и ДОМ рече дека како кандидатка за градоначалничка, целиот свој капацитет и своето срце ќе го даде за Аеродром, на кој ќе се гордееме. Според неа, во изминатите 17 години го потврдиле сивилото во управувањето на општината, а сега е потребно вклучување на граѓаните во донесувањето на одлуките.

– Да се оттргнеме од празните ветувања и од неостварливите проекти од изборната кампања на другите кандидати. Градежниот грев во стариот Аеродром, кое е новото Дебар Маало, е нешто на кое сведочиме. Сега е моментот за промени, да ставиме крај на сето тоа и да свртиме нова страница. Аеродром заслужува алтернативи за економски развој, енергетска ефикасност и рамномерен развој и во урбаниот и во руралниот дел – истакна Аврамоска-Ѓореска.

 

 

Видео на денот