Министерот за култура и туризам Зоран Љутков во рамки на редовните посети на националните установи, лично се увери во напредокот на обновата на Националната опера и балет, најстарата институција од овој тип во државата каде за помалку од 100 дена со сопствени средства на НОБ и со донации и спонзорства се санирани некои ургентни состојби во внатрешноста со кои се подобруваат условите за уметниците, но и за посетителите.

Но во експозето за сработеното во првите 100 дена од новата Влада премиерот Мицкоски не спомена ниту еден проект од културата и туризмот, па министерот Љутков најави прес-конференција на која ќе ги претстави сите реализирани проекти во овој период.

Повеќето други установи од културата се во очајна состојба, констатира резигнирано министерот Љутков, дури и некои од поновите, градени 2014-15 како што е објектот на Македонскиот народен театар кој протекува кога има врнежи. Според министерот, објектите се девастирани и ќе треба време да се санираат последиците од недомаќинското работење на претходната влада во изминатите 7 години.

– МНТ е нова институција и не е точно дека таа не е градена квалитетно. Која било институција ако не се одржува, нормално дека ќе попушти. И дома ако не одржувате ќе се случи нешто. Не ги третирале како да се нивна сопственост. Буквално агресивно и вулгарно се однесувале кон институциите. МНТ можела да добива средства за поправки, со 50.000 евра можеле да се направат интервенции и да нема повеќе штети. Тие 7 години не ги одобрувале тие средства 50.000 евра, иако имало проект и сега ние за наредната година имаме проект и ќе го санираме, ќе го доправиме уште малку, и ќе запре протекувањето во МНТ. Овде ќе се санира кровот и ќе запре протекувањето, но до толку се девастираме во овие 7 години што навистина веќе не знаеме кој крај да фатиме – вели Љутков.

Од друга страна во Националната опера и балет веќе влезот во фоајето доби нов лик како и тоалетите за посетителите, а ќе се расчистува и Ателјето за нова сценографија за новите проекти, набавен е нов балетски под за целата сцена, а останува да се среди покривот кој исто така протекува и главниот влез.

– По Нова година ќе има поголеми интервенции во заградата, за обнова на институцијата за да изгледа како што треба, како што доликува на една ваква институција, но главната поента на Министерството е да ја поддржи живата уметност, односно да вложи значителни средства, во репертоарот на куќата и тоа го прави и наскоро ќе се види – вели директорот Оливер Арсовски.

Тој го најави оперско – балетскиот проект „Кармина Бурана“ за 16 октомври, а потоа и „Дамата со камелии“ на Верди. Ноември во НОБ ќе биде месец на Пучини, па на репортоарот се „Боеми“, „Тоска“, Мадам Батерфлај“ и „Турандот“ со странски пејачи и диригенти.

Меѓу проектите кои се предизвик за Министерството за култура и туризам во наредниот период е обновата на руинираната Централна пошта во Скопје која треба и да стане мултифункционален комплекс кој треба да биде готов во наредните три години, односно кога Скопје ќе биде Европска престолнина на културата за 2028 година па во таа насока веќе е формирана Работна група од европските комисии и од Министерството за транспорт и врски и од култура.

Поради законски пречки засега Министерството не може да ја реализира планираната реконструкција на Универзалната сала бидејќи објектот е на Град Скопје и има проблеми со документацијата за нејзино времено преземање заради обнова.

-Не зборуваме за нов проект, не зборуваме за рушење, само за легално преземање на овој постоечки проект којшто го имаме сега за да бидеме и ние сигурни и исправни пред Законот за да можеме да продолжиме најлогично како што треба – нагласи Љутков.

Министерот најави дека наскоро ќе биде распишан конкурс за креативни индустрии од кои државата може да има голем економски бенефит, а културата да стане значајна економска гранка во државата, додека пак финансирањето на интердисциплинарните индустрии прво треба да биде регулирано со закон за да се отвори конкурс за нив.