Аријан Адеми и Стефан Ристовски со нивниот Динамо Загреб му гостуваат на Виљареал и иако имаат негатива од првиот натпревар, се надеваат дека на крајот тие ќе се пласираат во полуфиналето.
– Ќе го нападнеме Виљареал од првата минута, немаме што да загубиме – изјави Ристовски.

Првата средба заврши со минимален триумф на шпанскиот тим, но во Динамо веруваат дека по пауза од 54 години, хрватскиот тим ќе игра во европско полуфинале.
– Со нетрпение го очекуваме натпреварот бидејќи ова е уште една можност да се покажеме во Европа, да го претставиме Динамо. Сите сме подготвени и максимално сме мотивирани па се надеваме дека на крајот ние ќе се радуваме – вели првиот голгетер на екипата, Мислав Орсиќ.

Стефан Ристовски сигурно ќе биде во првиот тим на Динамо, додека неизвесен е настапот на Аријан Адеми поради повреда, но хрватските медиуми најавуваат дека можно е тој да истрча на теренот од првата минута.
Во останатите натпревари од четвртфиналето, Манчестер јунајтед има предност од 2:0 од првиот натпревар и за очекување е без проблеми да ја елиминира Гранада, додека максимална неизвесност ќе има на натпреварите Славија Прага – Арсенал (1:1) и Рома – Ајакс (2:1).