Денеска во последниот 10 натпревар од групната фаза во Европската лига екипата на Еурофарм Пелистер загуби на гостувањето кај Кадетен Шафхаузен со 29:26.

После поразот на ГОГ кај Рајн Некар, се отвори шанса за играчите на Жељко Бабиќ да се борат за втората позиција во својата група, но истата не успеаја да ја искористат со нова победа.

Бабиќ за овој дуел не можеше да смета на повредените Кузманоски, Маџовски, Кушан, Кукуловски и Вегар, додека поради проблеми со визата недостасуваше Египќанецот Хендави.

Босанските интернационалци Периќ со седум и Граџан со шест погодоци беа најефикасни во редовите на битолската екипа. На спротивната страна за швајцарскиот тим доминираше Унгарецот Барток со седум голови, четири имаше Шелкер.

На конечната табела во групата „Д“ Рајн Некар го освои првото место со 17 бодови, пред Кадетен (14), ГОГ (12), Еурофарм Пелистер (11), Тримо Требње (6) и Татабања (0).

Нашата екипа во осминафиналето ќе ги одмери силите против германскиот Магдебург, првопласираниот од групата „Ц“.