Медицинскиот дел на српскиот Кризен штаб ќе бара сите училишта во Србија да се префрлат на онлајн настава, барем за 10 дена, и за тоа време да се зголеми опфатот на вакцинација на деца од 12 до 18 години.

Лекарите од српскиот кризен штаб , исто така, ќе бараат примена на ковид пропусниците – за сите затворени простории, освен во продавниците каде што се продава храна.

– Оваа катастрофална епидемиолошка состојба итно треба да ја решиме, по истиот модел како и другите цивилизирани земји – ги пренесуваат изјавите на медицинскиот дел на кризниот штаб српските медиуми.

Српската медицинска фела смета дека во моментов само околу еден процент од децата се вакцинирани, а дека со масовна имунизација на децата од училишната возраст, почнувајќи од 12 години и со само една доза од вакцината, би постигнале фантастичен резултат. Тоа е единствениот начин да се заштитат децата, кои сè повеќе заболуваат од ковид, дури и со исклучително тешка клиничка слика, сметаат српските лекари.

Во однос на неодамна донесените мерки, медицинскиот дел од српскиот кризен штаб соопшти дека се недоволни и дека ковид пропусниците треба да бидат задолжителни во текот на целиот ден, а не само по 22 часот како што беше одлучено минатата недела.

Од мај инсистираме на воведување на „пасошот“ на ковид и веруваме дека на сите им е јасно дека ваквото парцијално решение не може да нè одведе до целта. Не е време за собири, ниту во 10 часот наутро, ниту во 22 навечер, сметаат српските епидемиолози.

Изминатиот период во јавноста излегоа несогласувањата за воведување на нови мерки на медицинскиот дел од една и економско-политичкиот дел на српскиот кризен штаб за борба против пандемијата од друга страна.

Наспроти медицинарите кои предупедуваат за нагло ширење на вирусот и бараат 10- дневно целосно затворање на Србија за да се спречи ширењето на вирусот, политичко- економските членови на кризниот штаб засега одбиваат да дадат согласност за затворање бидејќи стравуваат од последици и нови удари врз српската економија