Претставници на европските земји го користат украинскиот конфликт за да ги саботираат напорите на Соединетите Американски Држави, како и на сите поддржувачи на праведно решение, изјави денеска рускиот министер за надворешни работи Сергеј Лавров, пренесе „En.ru“.

„Европа ја користи украинската криза за да се потврди, да подметнува клинови во тркалата и да кова заговор против Соединетите Американски Држави и сите оние кои сакаат праведно решение“, рече Лавров.

Тој предупреди дека во земјите на ЕУ повторно оживува идеологијата на нацизмот.

„Најтажното и најопасното во врска со ова е што во Европа, меѓу овие елити, пред сè во Брисел, но и во престолнини како Берлин, Лондон, Париз, а да не ги спомнуваме балтичките земји, оживува теоријата и практиката на нацизмот“, истакна шефот на руската дипломатија.

Генералниот секретар на НАТО, Марк Руте, минатата недела ги повика европските земји да ја зголемат воената потрошувачка со цел да продолжат да „вршат притисок врз Русија и да ги поддржуваат напорите за завршување на конфликтот во Украина“.

Лавров претходно изјави дека Русија и Соединетите Американски Држави ги решиле недоразбирањата што настанале по средбата на лидерите на двете земји, Владимир Путин и Доналд Трамп, во август на Алјаска, благодарение на неодамнешните разговори во Кремљ меѓу рускиот претседател и специјалниот пратеник на САД, Стив Виткоф, пренесува Танјуг.

Лавров нагласи дека Вашингтон покажува интерес за вистинска анализа на причините за украинската криза и дека Русија и САД се договориле за заеднички пристапи кон украинското решение.